Amirreza Abbasi امیررضا عباسی

وب سایت شخصی امیررضا عباسی

اذن وئر

اذن وئر

اذن وئر توی گئجه سی من ده سنه دایه گلیم

ال قاتاندا سنه مشاطه تماشایه گلیم

سن بو متهاب گئجه سی سئیره چیخان بیر سرو اول

اذن وئر من ده دالونجه سورونوب سایه گلیم

منه ده باخدین او شهلا گؤزوله ، من قارا گون

جراتیم اولمادی بیر کلمه تمنایه گلیم

من جهنم ده ده باش یاسدیغا قویسام سنیله

هئچ آییلمام کی دوروب جنت ماوایه گلیم

ننه قارنیندادا سنله اکیز اولسایدیم اگر

ایسته مزدیم دوغولوب بیرده بو دونیایه گلیم

سن یاتیب جنتی رویاده گؤرنده گئجه لر

من ده جنت ده قوش اوللام ، کی او رویایه گلیم

قیتلیغ ایللر یاغیشی تک قورویوب گؤز یاشیمیز

کوی عشقینده گرک بیرده مطلایه گلیم

سن ده صحرایه ماراللار کیمی چیخ ، تولی کی

من ده بیر صیده چیخانلار کیمی ، صحرایه گلیم

آللاهوندان سن اگر قورخمویوب ، اولسان ترسا

قورخورام منده دؤنوب مذهب عیسی یه گلیم

شیخ صنعان کیمی دونقوز اوتاریب ایللرجه

سنی بیر گؤرمک اوچون معبد ترسایه گلیم

یوخ صنم ! آنلامادیم ، آنلامادیم ! حاشا من

بوراخیب مذهبیمی ، سنله کلیسایه گلیم

گل چیخاق طور تجلایه ، سن اول جلوه طور

من ده موسی کیمی ، او طور تجلایه گلیم

شیردیر « شهریار » ین شعری الینده شمشیر

کیم دئیه ر من بئله بیر شیرله دعوایه گلیم ؟

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

This site uses Akismet to reduce spam. Learn how your comment data is processed.

Amirreza Abbasi امیررضا عباسی © 2018 Frontier Theme