دریا ائله دیم

ترکی بیر چشمه ایسه ، من اونی دریا ائله دیم

بیر سویوق معرکه نی محشر کبرا ائله دیم

بیر ایشیلتیدی سوها اولدوزی تک گؤرسه نمه ز

گؤز یاشیملا من اونی عقد ثریا ائله دیم

امیدیم وار کی بو دریا هله اقیانوس اولا

اونا ضامن بو زمینه کی مهیا ائله دیم

عرفانا چاتماسا شعر و ادب ابقا اولماز

من ده عرفانه چاتیب ، شعریمی ابقا ائله دیم

ابدیتله یاناشدیم دوغولا حافظه تای

شیرازین شاهچراغین ، تبریزه اهدا ائله دیم

ترکی نین جانینی آلمیشدی حیاسیز طاغوت

من حیات آلدیم اونا ، حق اوچون احیا ائله دیم

( فیض روح القدس ) اولدی مددیم حافظ تک

من ده حافظ کیم اعجاز مسیحا ائله دیم

قمه قداره لر آغزیندا دیل اولموشدو سوگوش

من سه وینج ائتدیم اونی ، خنجری خرما ائله دیم

ایندی گؤیله رده گؤزه ل صفله صفا ایله گه زیر

منجلابلاردا اوزه ن اوردگی دورنا ائله دیم

باخ کی ( حیدربابا ) افسانه تک اولموش بیر قاف

من کیچیک بیر داغی سر منزل عنقا ائله دیم

بوردا ( روشن ضمیرین ) ده هنرین یاد ائده لیم

من اونوندا قلمین طوطی گویا ائله دیم

نه تک ایراندا منیم ولوله سالمیش قلمیم

باخ کی ترکیه ، ده قفقازدا نه غوغا ائله دیم

باخ کی تهراندا نه فرزانه لر اولموش واله

باخ کی تبریزده نه شاعرلری شیدا ائله دیم

هم ( سهندیه ) سهندین داغین ائتدی باش اوجا

هم من اؤز قارداشیمین حقینی ایفا ائله دیم

آجی دیلله رده شیرین ترکی اولوردی حنظل

من شیرین دیلله ره قاتدیم اونی حلوا ائله دیم

هرنه قالمیشدی کئچه نله رده ن اونا بال پتگی

اریدیب موملو بالین شهد مصفا ائله دیم

ترکی والله آنالار اوخشاغی لای لای دیلی دیر

دردیمی من بو دوا ایله مداوا ائله دیم

شهریار ، حیف ساووخدیر بو دگیرمان هله ده

دارتماغا یوخدی دنی ، من ده مدارا ائله دیم