بیر سوروشون بو قارقینمیش فلکدن
نه ایستیور بو قوردوغى کلکدن؟
دینه گئچیرت اولدوزلارى الکدن
قوى تؤکولسون، بو یئر اوزى داغیلسین
بو شیطانلیق قورقوسى بیر ییغیلسین

بیر اوچئیدیم بو چیرپینان یئلینن
باغلاشئیدیم داغدان آشان سئلینن
آغلاشئیدیم اوزاق دوشن ائلینن
بیر گؤرئیدیم آیریلیغى کیم سالدى
اؤلکه میزده کیم قیریلدى، کیم قالدى

من سنون تک داغا سالدیم نفسى
سنده قئیتر ، گویلره سال بوسسى
بایقوشوندا دار اولماسین قفسى
بوردا بیر شئر داردا قالیب، باغیریر
مروت سیز انسانلارى چاغیریر

حیدربابا، غیرت قانون قاینارکن
قره قوشلار سنن قوپوپ، قالخارکن
او سیلدیریم داشلارینان اوینارکن
قوزان، منیم همتیمى اوردا گؤر
اوردان اییل، قامتیمى داردا گؤر

حیدربابا، گویدن دورنا گئچنده
کوراوغلونون گؤزى قارا سئچنده
قیر آتینى مینیب، کسیب، بیچنده
منده بوردان تئز مطلبه چاتمارام
ایوز گلیب، چاتمیونجان یاتمارام

حیدربابا، مرد اوغوللار دوغگینان
نامردلرین بورونلارین اوغگینان
گدیکلرده قوردلارى توت ، بوغگینان
قوى قوزولار آیین-شایین اوتلاسین
قویونلارون قویروقلارین قاتلاسین

حیدربابا، سنون گؤیلون شاد اولسون
دونیا وارکن، آغزون دولى داد اولسون
سنن گئچن تانیش اولسون ، یاد اولسون
دینه منیم شاعر اوغلوم شهریار
بیر عمر دور غم اوستونه غم قالار

حیدر بابا همیشه سربلند و سرافراز بمان و یاد شهریارت همواره گرامی